The Arab Expats

طيب .. كتير منيح, حكينا عن مرارة الغربة, و كيف إنّا كلنا “متشحتفين” بعيد عن أهلنا و صحابنا, و “تشهونّا” على المنسف شويّ, و على القلايّة شويّ تانية… جاي على بالي أتشحتف على العطل و الرحلات اللي طالعة عيني على وحدة!!!

يعني أيام العطلة (الويك إند) في هالبلد كلها نفس الشي, نفس الروتين, ما بنصدق على الله و هي تيجي, إما علشان نعوض نقص النوم (في حالتي أنا خصوصاً), أو مشان نخلص أشغالنا اللي ما بنقدر عليها في أيام الأسبوع, و في حالات إستثنائية ممكن تعمل شغلة بعيد عن الروتين.

الجو هلأ في عمان مناسب جداً للرحلات على ما أظن, يعني أنا بتزكّر شهر ٤ و ٥ كانو دائما أشهر الرحلات عنّا, كل أسبوعين إزا مش كل عطلة أسبوع كان لازم يكون في مشوار “هش و نش” إا على دبين, السلط, جرش, أو مناطق تانية إإسمها مش خاطر في بالي للأسف.

و طبعاّ الطلعة كانت على الأقل فيها ٥ عائلات (هول بس عمامي و عمّاتي, من غير ولادهم المتزوجين), الرجال يستلمو الشوي, و الستات يستلمو الشك و السلطات و غيرو, الولاد الصغار يركضو و يصرخوا  ورا بعض زيّ اللي شايفين عفريت هههههههه … و إحنا الصبايا (أنا و بنات عمي و عمتي  من ١٧ - ٢٨) يا إما بنلعب شدّة و معطينها أرجيلة, با إما بنتمشّا, و مرات تانية بلعب مع الصغار “البيضة” أو “طائرة”, أو لعبتي المفضلة “ريشة”…

يعني جربت كم مرّة أطلع هون مع الناس, بس مش طبيعي الملل اللي حسيت فيه,  مافي حدا من جيلي, و جد بتطلع عيني و أنا بسمع القصص اللي المفرووووووووووووض ما تنحكى برحلة!!!

وين أيامك يا عمان… يعني لو إجازة ال ٣ أيام هادي هلأ في عمان كان الواحد أعطاها أحلى نزلة على العقبة مع شباب و بنات العيلة… بس يلاّ …الله يتوب علينا من الغربة .. قولوا آمين.